Dar es Salaam.
Tanzania imesema imepiga hatua kubwa katika kulinda haki na ustawi wa watu wenye ualbino ikilinganishwa na baadhi ya mataifa mengine barani Afrika, licha ya kuwepo kwa changamoto za unyanyapaa, ubaguzi na ukatili dhidi ya kundi hilo.
Kauli hiyo imetolewa wakati Jukwaa la Uratibu na Utekelezaji wa Mpango Kazi wa Kitaifa wa Haki na Ustawi wa Watu Wenye Ualbino (MTHUWWU) likiwakutanisha wadau mbalimbali kutoka serikalini, taasisi za kimataifa, asasi za kiraia pamoja na vyama vya watu wenye ulemavu kujadili changamoto zinazokabili watu wenye ualbino nchini na barani Afrika kupitia Mtandao wa Watu Wenye Ualbino Barani Afrika (Africa Albinism Network).
Akizungumza jana, Septemba 28, 2026, jijini Dar es Salaam wakati wa uzinduzi wa jukwaa hilo, Waziri wa Nchi, Ofisi ya Waziri Mkuu (Sera, Bunge na Watu Wenye Ulemavu), Profesa Palamagamba Kabudi, amesema Serikali imeandaa mbinu na nyenzo maalum za utoaji wa taarifa na hatua za kuchukua kwa makundi ya watu wenye ulemavu ili kuhakikisha hayaachwi nyuma kuelekea msimu wa mvua za El Niño zilizotabiriwa na Mamlaka ya Hali ya Hewa Tanzania (TMA).
Profesa Kabudi amesema hatua hizo zimeandaliwa kukabiliana na madhara yanayoweza kusababishwa na mvua hizo kwa makundi maalum, wakiwamo watu wenye uoni hafifu, viziwi na watu wenye aina mbalimbali za ulemavu.
Akizungumzia hali ya ulinzi na haki za watu wenye ualbino, Profesa Kabudi amesema Tanzania imepiga hatua kubwa ikilinganishwa na mataifa mengine ya Afrika, ambako bado changamoto za unyanyapaa, ubaguzi na ukatili dhidi ya watu wenye ualbino zinaripotiwa.
Kwa upande wake, Mwenyekiti wa Chama cha Watu Wenye Ualbino Tanzania (TAS), Godson Mollel, ameipongeza Serikali kwa jitihada zake za kukabiliana na mauaji na ukatili dhidi ya watu wenye ualbino, akisema utekelezaji wa mpango huo mpya unatoa matumaini makubwa katika kuboresha maisha yao na kuhakikisha wanapata fursa sawa katika elimu, ajira na huduma za afya.
Hata hivyo, Serikali imesisitiza kuwa itaendelea kufanya mapitio ya Sera ya Taifa ya Huduma na Maendeleo ya Watu Wenye Ulemavu ya mwaka 2004 ili iendane na mabadiliko ya kiteknolojia pamoja na mahitaji ya sasa ya kijamii na kiuchumi.
