Na Mwandishi wetu, Dodoma
Mkurugenzi Mtendaji wa Shirika la Umeme Tanzania (TANESCO), Lazaro Twange, amewataka mameneja wa shirika hilo nchini kuongeza kasi ya kupambana na wizi wa miundombinu ya umeme, akisema tatizo hilo linaathiri utoaji wa huduma na kuharibu taswira ya taasisi.
Twange ametoa kauli hiyo wakati akifungua Mkutano Mkuu wa mwaka wa Mameneja na Wakurugenzi wa Kanda wa TANESCO unaofanyika jijini Dodoma.
"Tunapongezwa kwa kutoa huduma bora kwa wananchi, lakini sasa tunapaswa kuongeza juhudi za kulinda mali za shirika na kumaliza changamoto ya wizi wa vifaa vya umeme," alisema.
Mkutano huo umewakutanisha mameneja kutoka mikoa mbalimbali pamoja na viongozi wa kampuni tanzu za TANESCO kwa lengo la kupitia utendaji wa shirika na kujadili masuala ya utoaji wa huduma za umeme nchini.
Mbali na suala la ulinzi wa miundombinu, Twange pia amewataka viongozi hao kuongeza ubunifu katika ukusanyaji wa mapato, akisema mafanikio ya TANESCO katika kuboresha huduma yanategemea uwezo wa shirika kukusanya mapato yake.
"Miradi na huduma nyingi tunazowafikishia wananchi zinategemea mapato tunayokusanya. Tunahitaji mbinu mpya na bunifu za kuongeza mapato," alisema.
Katika miaka ya karibuni, Tanzania imeendelea kuwekeza katika upanuzi wa huduma za umeme na kuimarisha upatikanaji wa nishati, huku sekta hiyo ikitajwa kuwa moja ya nguzo muhimu za kukuza uchumi na viwanda.
Mameneja walioshiriki mkutano huo walisema kikao hicho kinatoa nafasi ya kutathmini utekelezaji wa mipango ya shirika na kuweka mikakati ya kuboresha huduma.
Meneja wa TANESCO Mkoa wa Manyara, Regina Mvungi, alisema mkutano huo ni muhimu katika kupima utekelezaji wa mpango mkakati wa shirika, huku Meneja wa Mkoa wa Ruvuma, Eliseus Mhelela, akisema wako tayari kutekeleza maelekezo yote yaliyotolewa na uongozi wa shirika.
Mkutano huo ulianza Juni 24 na unatarajiwa kuhitimishwa Juni 26, 2026.
