Na Mwandishi wetu
Umoja wa Mataifa umeviongeza vikosi vya Israel kwenye orodha yake ya wahusika wanaotuhumiwa kuhusika na ukatili wa kingono unaohusiana na migogoro ya kivita.
Ripoti hiyo ya mwaka imewasilishwa makao makuu ya UN na Pramila Patten, ikiwa pia inavitaja vikosi vya Urusi katika kundi jingine.
Kwa mujibu wa ripoti hiyo, vikosi vya Israel vikiwemo jeshi, huduma za magereza na baadhi ya vitengo vya polisi, vimewekwa kwenye orodha hiyo kutokana na taarifa zinazoaminika kuhusu matukio ya ukatili wa kingono.
Patten amesema hatua hiyo imekuja baada ya ripoti za awali kuonyesha wasiwasi na kutoa onyo kuhusu tuhuma hizo, sambamba na changamoto za kupata ufikiaji wa maeneo ya uchunguzi.
Amesema pia timu za UN zimekumbana na vikwazo vya kufikia baadhi ya maeneo ya migogoro, jambo linaloathiri uthibitisho wa matukio yaliyoripotiwa, hususan Gaza.
Hata hivyo, ripoti inasema UN imeweza kuthibitisha matukio 31 ya ukatili wa kingono katika mwaka 2025 yanayohusishwa na vikosi hivyo, yakihusisha wanaume, wanawake na watoto kutoka Gaza na Ukingo wa Magharibi.
Matukio hayo yameripotiwa kutokea zaidi katika vituo vya kizuizini, vituo vya ukaguzi na wakati wa operesheni za kijeshi.
Israel imekuwa ikikanusha mara kwa mara tuhuma kama hizo, ikisisitiza kuwa vikosi vyake vinafuata sheria za kimataifa na kwamba malalamiko yoyote yanachunguzwa.
Ripoti hiyo inatarajiwa kuzua mjadala mpya wa kidiplomasia ndani ya Umoja wa Mataifa kuhusu hali ya haki za binadamu katika maeneo ya migogoro.
