Na Mwandishi wetu
Bodi ya Huduma za Maktaba Tanzania (TLSB) imesema hatua ya kuingia katika mfumo wa Maktaba Mtandao wa Taifa itasaidia kusogeza huduma za maktaba kwa wananchi wengi zaidi ndani na nje ya nchi.
Akizungumza katika Maonesho ya 50 ya Biashara ya Kimataifa ya Dar es Salaam (Sabasaba), Mkurugenzi wa Idara ya Uendeshaji Huduma za Maktaba wa TLSB, Dkt. Rehema C. Ndumbaro, alisema mfumo huo umeanzishwa kwa lengo la kuongeza upatikanaji wa vitabu na taarifa kwa njia ya kidijitali.
Alisema maendeleo ya teknolojia yamebadilisha namna watu wanavyotafuta maarifa, jambo ambalo limeifanya TLSB kuendelea kuboresha huduma zake ili ziendane na mahitaji ya sasa ya jamii.
Kwa mujibu wa Dkt. Ndumbaro, mfumo huo utawaruhusu wanafunzi, watafiti na wananchi wengine kupata rasilimali mbalimbali za kielimu bila kulazimika kufika katika majengo ya maktaba.
Alisema huduma hizo zinatarajiwa kuongeza usomaji, kusaidia shughuli za utafiti na kurahisisha upatikanaji wa taarifa muhimu kwa makundi tofauti ya wananchi.
Dkt. Ndumbaro alibainisha kuwa maonesho ya Sabasaba yamekuwa fursa muhimu kwa taasisi hiyo kukutana na wananchi, kuwaelimisha kuhusu huduma zinazopatikana na kuhamasisha matumizi ya mifumo ya kidijitali.
Alisema TLSB inaendelea kutekeleza mikakati ya kuimarisha huduma za maktaba nchini kwa kutumia teknolojia ili kuhakikisha maarifa yanawafikia wananchi wengi zaidi kwa urahisi.
Wananchi waliotembelea banda la TLSB katika maonesho hayo walipata fursa ya kujifunza kuhusu huduma za maktaba mtandao na namna ya kuzitumia katika shughuli zao za kila siku za kujifunza na kufanya utafiti.
